Eersame, goede vrient. Ic heb ontfangen uwen brief den XIXen dach augusti, bij den welck ghij mij scrijft
hoe dat ghij gerne zout weeten van waer die Brocken gesproeten sijn. Soe sult ghij weeten dat sij
gesproten syn van Sint Oeden Roede ende dat daer geweest sijn drie gebroeders ende hebben gefondeert
een beneficie. Ende die selve gebroders die hebben elck verweckt kynderen. Vanden eenen is gecoemen
Aert Brock ende heeft eenen soen aftergelaeten, dat een minderbruuer is. Ende die ander een dochter
ende eenen soen. Ende waer die vervaeren syn, dat is mij onkennelyck. Ende den doerden was mijn vader,
die sinen vaeder nyet gekent en heeft, doer syn aflyfichheyt vander groter peste geleden hondert jaer.
Ende ic en heb myn vader ooc nyet gekent doer syn coert leven, want hij hadde gedient koninck Philips,
die bleeff in Hispaniën. Ende daer was hij bij XVII jaeren, ende was in dienste van hem. Ende ic doen ic
was out XIII jaeren heb ic geweest voer Weenen, doe den Toerk ierst daer quaem, ende voert in Italiën
ende Vrancryck. Dat ic die vrienden ooc nyet voele gekent en hebbe, dan dat ic nu gewoent hebbe met
myn huysvrouwe tot Roede XXXIII jaeren ende bij haer verweeckt eenen soen genaempt Jan Brock, ende
V dochteren. Ende doer die groete menichte van dochteren soe is het geheel gheslecht vytgaende, dan op
mijnen persoen ende mynen soen. Want in Brabant en weet ic nyemant vanden neame meer dan mijnen
persoen. Dan wij hebben voele nichten ende neven om het verhuuelycken dat daer dagelycks geschiet,
maer het is een soe eerlick geslecht geweest ende noch is, van alle die vrienden als tot Sint Oeden Roede
is ende woenachtich syn, van goeden leven ende anders. Ende meester Jan Brock, secretaris der stadt
vanden Bossche, was ons neven. Maer aengaende der wapenen, soe en weet ic nyet te scriven. Ic
geloeve dat daer wapenen syn, want sij hebben scepenen geweest ten Bossche ende tot Sint Oeden
Roede, maer byden brant geschiet over LXXX jaeren ende nu bij Marten van Rossem soe syn die glaese
vensters al gedestrueert ende te nyet gedaen. Compt eens over. Wij sullen met den anderen goedt siere
maeken ende drincken eenen pot wyns met malcanders. Hiermede zyt den heer bevoelen wt Sint Oeden
Roede den XXIIen dach augusti bij u diender wat ic vermach.
Henrick Brock, boede vanden Raede in Brabant.
[In dorso:] Aenden eersamen ende vroemen heeren Wouteren Brock, woenende Tutrecht opde
Domkerchoff, sinen goeden vrient tot Tutrecht.
Rpi XVII junii anno 1565.